ســاعــات !!

استعرض الموضوع السابق استعرض الموضوع التالي اذهب الى الأسفل

ســاعــات !!

مُساهمة  Lion في السبت 05 أبريل 2008, 12:42 am



ساعات تحس انك ملك الدنيا دي كلها و محدش قدك و ان الدنيا اتخلقت على مقاسك و من الاستخدام بتريح معاك .. يعني تلبيسها مظبوط عليك على رأي بياعين الجينز النصابين !!

و ساعات تحس انك مخنوق خنقة واحد ركب ميكروباص في اخر كرسي و قاعد جنبه تلاتة ارخم من بعض و نازل اول محطة .. و عارف ان السواق هيلعن اليوم اللي ركبه فيه معاه قبل ما يقف و ينزله على بعد 3 محطات من المحطة اللي كان نازلها اصلا !!
و ساعات تحس انك قوي .. قوي اوي .. لدرجة انك ممكن تشيلا الكرة الارضية و تلفها بسرعة اكبر من السرعة اللي بتلف بيها اصلا و كمان ممكن تقربها من الشمس زيادة عشان تسيح القطبين و تغرق الصحراء و الناس تلبس ميهوات في كل مكان و العيال الصغيرين يبنوا بيوت على الرمل اللي كان صحراء جرداء !!

و ساعات تحس انك خايف و جبان .. تايه .. جعان .. جعان احاسيس .. نفسك في صدر حنين يضمك .. حد يطبطب عليك .. عامل زي عيل صغير تاه في الزحمه من امه .. حاسس انه مش هيشوفها تاني .. حاسس انها تاهت منه .. عنده امل انها تظهر في اي لحظة و تحضنه زي الاول .. لكن عارف ان ده مش في اللحظة الجاية على الاقل !!

و ساعات متحسش باي حاجة كانك ميت .. مدفون .. بارد .. لو الدنيا اتهدت فوق دماغك .. فانت مش شايف غير كفنك الابيض .. و ميهمكش غير المساحة اللي واخدها جسمك من الارض اللي هي اصلا مش ملكك لان جسمك اصلا معدش ملكك !!

و ساعات تحس انك جيفارا .. ثائر على كل الاوضاع الغلط و ساعات كمان الاوضاع الصح اللي انت بس شايف انها غلط .. نفسك تكسر كل قواعد الكون .. و تعمل قواعدك انت بس .. اللي كل الكون هيمشي عليها و لما يمشي عليها هتكون جنة الارض باسمك !!

و ساعات تحس انك اغنى راجل على وجه الارض و عايز تبقى اكثر غنى و شهرة .. و تشتري دولتين تفتحهم على بعض .. و تملك الشوارع بناسها و الكل يتفرغ انه يشاورلك و انت معدي !!

و ساعات نفسك تكون صياد فقير .. في مركب فقير .. تقعد يومك كله على امل تصطاد سمكه فتتعشى و تنام مرتاح او يوم تزهق فتبيعها و تشتري لقمة عيش ناشفة تاكلها باي حاجة و مش عايز الخاتم اللي انت بتحلم تلاقيه عشان تبقى غني و تلعن الغنا و الاغنيا و ترجع صياد !!

ساعات .. ساعات .. ساعات .. طول ما عقرب الثواني بيجري خايف من عقرب الدقاقيق يسبقه .. فيستغنى عنه عقرب الساعات طالما الدقايق مشغله .. هتكون فيه ساعات و اطوار
ساعات .. ساعات تحس انك انسان !!
avatar
Lion
Admin

عدد الرسائل : 18
العمر : 32
تاريخ التسجيل : 02/04/2008

معاينة صفحة البيانات الشخصي للعضو http://one4all.allgoo.us

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى